زيك

عارف ؟؟ ..

أنا برضي ماشة ..

و قريب كمان ..

زيك ،

لكني ما زيك .. !

إستعدادي هادىء ما عنده صوت ..

بدون وداع .. ودموع

و بدون ووعود ..

برااحة براحة ..

بلملم حاجاتي ..

و بستف فيها ..

زيك ..

لكني برضي ما زيك !

شنطي ما مليتها هدوم ،

و عطور وورق ..

أبداً ..

مع إنه حاجاتك كتيرة ..

بس،

أنا شنطي أكبر،

و أتقل .. !!

ما تستغرب ..

وأسألني ليه !

لأنها فيها كل الحاجات الإنت حتخليها وراك ..

أيوه .. كل الحاجات الما هاماك ..

حأشيلها معاي ..

كل الأحاسيس الحلوة،

و الأيام ..

كل الذكريات البيناتنا ..

و الأحلام ..

أيوه ! كل الهتش و الكرور دا ..

حأشيله معاي .. !!

و حأمشي ..

زيك ،

لكني برضي ما زيك .. !!

حأشيل معاي قصصنا،

و كل الكلام ..

كل كلامنا عن بكرا ،

و بكرا تفتكر جاي ؟

غايتو ،
كان جا ولا ما جا ..

برضو حأشيلو معاي .. !!

هي! و قربت أنسى ..

الوعود .. !!

حتى لما وعدتني بأنك حتعود ..

ما مشكلة لو نسيتها ..

حأشيل معاي كل الورود !

و أسماء أولادنا ..

وبيتنا الكبير ..

كل أماني الفرح ..

و أيام زمان ..

شفت !

مش قلت ليك حاجاتي أكتر من حاجاتك ؟؟!

و طبعاً بما إنك ما حتفقده،

برضو حأشيل حبي ليك ..

حاكرفسه و أطبقه ،

و أكتب عليه "كان قابل للكسر" ..

أكيد حأدفع فيه وزن إضافي ..

بس ما مشكلة ..

برضي ما حأخليه وراي !

و عارف في ركن شنطتي هناااك في شنو ؟

أيوه في الركن داك ..

كدى عاين كويس ..

أها .. دى ضحكتك ..

معقولة فاكرني حأخليها وراي ؟

طيب عارف حأرسم عيونك وين ؟

طبعاً غلبك الجواب ..

حأرسمها هناااك فوووق ،
جوه السحاب ..

تديني دافع أمل كل ما يطول الغياب ..

و كل ما أتذكرك ..

و أقول أجيك ..

و فجأة تصدمني حقيقة إنك مشيت ..

و إني كمان برضي مشيت ..

عارف إني ماشة بعيد ؟؟

زيك ..

لكني برضى ما زيك ..

ماشة بعيد وأنا في مكاني ..

أصلي ما حأغير عنواني ..

حأفضل أنا ..

بس ما زي ما أنا ..

زيك ..

لكني ما زيك !!